مليار عندي وإلا عندي مَلاليم=في قصر اسكن وإلا في ظِلْ خِيمَه
مخلوق أعبد خالق الغيث بالغيم=ادعي وانا أدري رحمة الله عظيمَه
مِن عاش ظالم وإلا عايش بَهَ الضيم=ميزان عبد(ن) بين ظلمه و ضيمَه
وشلون قبل المال نرفقله الجيم=لامِن فقير(ن) ياخذه أو يتيمَه
أُطلُبْ رضا الله دون زيف(ن) و تغييم=فِعْل الخَفى للخير يعطيه قِيمَه
متى يكون الطيب في الناس تسميم=لَمّا الممنّه تِفْقِدَ الطيب شيمَه
متى نحس النّاس تحتاج تقييم=لمّا الأمانه في بعضهم عديمَه
لاشفت منهو دون ذمّه و تحريم=عَطْه الأمانه و العواقب وخيمَه
ياحظ منهو نام ضمن المظاليم=ما نام خاين و إلا ظالم ظِليمَه
وشلون أرمم بيت يحتاج ترميم=سِقيم ساس البيت وارضه سقيمَه
نفوس بعض النّاس تحتاج تعقيم=ونفوس بعض النّاس ماتت عقيمَه
الدّين تاج(ن) فوق راس المفاهيم=والفهم كنز(ن) في العقول الفهيمَه
من ابياتي
خالد البلوي
]]>